ഇൻസ്റ്റാഗ്രാം സബ്‌സ്‌ക്രിപ്ഷനിലൂടെ വൻ നേട്ടവുമായി റോഷ്‌ന ആൻ റോയ്; പുതിയ പരമ്പരയിലും താരം സജീവം
ഇൻസ്റ്റാഗ്രാമിലെ പ്രത്യേക സബ്‌സ്‌ക്രിപ്ഷൻ ഫീച്ചറിലൂടെ ചുരുങ്ങിയ ദിവസങ്ങൾക്കുള്ളിൽ വലിയ വരുമാനവും സ്വീകാര്യതയും നേടി നടി റോഷ്‌ന ആൻ റോയ് ശ്രദ്ധേയയാകുന്നു. പ്രതിമാസം 390 രൂപ നിരക്കിൽ 5,800-ലധികം പേരാണ് താരത്തിന്റെ എക്‌സ്‌ക്ലൂസീവ് കണ്ടന്റുകൾ ഇതിനോടകം സബ്‌സ്‌ക്രൈബ് ചെയ്തിരിക്കുന്നത്. ഇതിലൂടെ 22 ലക്ഷത്തിലധികം രൂപയാണ് വയനാട് സ്വദേശിനിയായ താരം ചുരുങ്ങിയ ദിവസങ്ങൾക്കുള്ളിൽ സ്വന്തമാക്കിയത്.
ദിവസങ്ങൾക്ക് മുൻപ് ഇൻസ്റ്റാഗ്രാമിൽ സബ്‌സ്‌ക്രിപ്ഷൻ ആരംഭിച്ച നടി അന്ന രാജനെ (1,965 സബ്‌സ്‌ക്രൈബർമാർ) മറികടന്നാണ് ഒരാഴ്ചയ്ക്കുള്ളിൽ റോഷ്‌ന ഈ മുന്നേറ്റം നടത്തിയിരിക്കുന്നത്. ഒമർ ലുലു സംവിധാനം ചെയ്ത ‘ഒരു അഡാർ ലവ്’ എന്ന ചിത്രത്തിലൂടെ മലയാളികൾക്ക് സുപരിചിതയായ താരം, സോഷ്യൽ മീഡിയയിൽ സജീവ സാന്നിധ്യമാണ്.
സോഷ്യൽ മീഡിയയ്ക്ക് പുറമെ ടെലിവിഷൻ രംഗത്തും റോഷ്‌ന ഇപ്പോൾ സജീവമാണ്. കൗമുദി ടിവിയിൽ സംപ്രേഷണം ചെയ്യുന്ന പ്രമുഖ കോമഡി പരമ്പരയായ ‘കനകം കാമിനി കലഹ’ത്തിലാണ് താരം നിലവിൽ അഭിനയിച്ചുകൊണ്ടിരിക്കുന്നത്. മികച്ച പ്രേക്ഷക സ്വീകാര്യത നേടി മുന്നേറുന്ന ഈ പരമ്പരയിലെ റോഷ്‌നയുടെ പ്രകടനവും ഇതിനോടകം ശ്രദ്ധിക്കപ്പെട്ടിട്ടുണ്ട്.
അഭിനയരംഗത്തിന് പുറമെ ഫാഷൻ, മേക്കപ്പ് മേഖലകളിലും വ്യക്തിമുദ്ര പതിപ്പിച്ച റോഷ്‌ന, കൊച്ചിയിൽ ഒരു ബ്രൈഡൽ ബൊട്ടീക്കും നടത്തുന്നുണ്ട്. തെന്നിന്ത്യൻ താരം വിജയ് സേതുപതിക്ക് വസ്ത്രങ്ങൾ ഡിസൈൻ ചെയ്തതും മുൻപ് വാർത്തകളിൽ ഇടംപിടിച്ചിരുന്നു.
