അനിരുദ്ധ് രവിചന്ദറും കാവ്യ മാരനും വിവാഹിതരാകുന്നു; വിവാഹം നവംബർ 21-ന്
ചെന്നൈ: പ്രശസ്ത തമിഴ് സംഗീത സംവിധായകൻ അനിരുദ്ധ് രവിചന്ദറും സൺ ഗ്രൂപ്പ് ചെയർമാൻ കലാനിധി മാരന്റെ മകളും ഐപിഎൽ ടീമായ സൺറൈസേഴ്സ് ഹൈദരാബാദിന്റെ സഹ ഉടമയുമായ കാവ്യ മാരനും വിവാഹിതരാകുന്നു. നവംബർ 21-നാണ് സിനിമാ-ക്രിക്കറ്റ് ലോകത്തെ പ്രമുഖർ അണിനിരക്കുന്ന താരവിവാഹം നിശ്ചയിച്ചിരിക്കുന്നത്.
മകളുടെ വിവാഹം ക്ഷണിക്കുന്നതിനായി കലാനിധി മാരൻ തെലങ്കാന മുഖ്യമന്ത്രി രേവന്ത് റെഡ്ഡിയെ സന്ദർശിച്ചതോടെയാണ് ഏറെ നാളായി നിലനിന്നിരുന്ന അഭ്യൂഹങ്ങൾക്ക് വിരാമമായത്. അനിരുദ്ധും കാവ്യയും പ്രണയത്തിലാണെന്ന തരത്തിൽ നേരത്തെ പ്രചാരണങ്ങളുണ്ടായിരുന്നെങ്കിലും ഇരുവരും വിവാഹത്തിലേക്ക് കടക്കുകയാണെന്ന വിവരം തെലങ്കാന മുഖ്യമന്ത്രി രേവന്ത് റെഡ്ഡിയാണ് സ്ഥിരീകരിച്ചത്.
പ്രധാനമന്ത്രി നരേന്ദ്ര മോദി ഉൾപ്പെടെയുള്ള ദേശീയ നേതാക്കളെ ഇരു കുടുംബങ്ങളും നേരിട്ടെത്തി വിവാഹത്തിന് ക്ഷണിച്ചിട്ടുണ്ട്. കാവ്യയുടെ മാതാപിതാക്കളായ കലാനിധി മാരനും കാവേരിയും, അനിരുദ്ധിന്റെ മാതാപിതാക്കളായ രവി രാഘവേന്ദ്രയും ലക്ഷ്മിയും ഒരുമിച്ചെത്തിയാണ് പ്രധാനമന്ത്രിയെ ക്ഷണിച്ചത്.
തമിഴ്‌നാട് മുഖ്യമന്ത്രി സി. ജോസഫ് വിജയ്, ആന്ധ്രാപ്രദേശ് മുഖ്യമന്ത്രി എൻ. ചന്ദ്രബാബു നായിഡു, കർണാടക മുഖ്യമന്ത്രി ഡി.കെ. ശിവകുമാർ എന്നിവർക്കും വിവാഹത്തിന് ക്ഷണമുണ്ട്. തമിഴ്‌നാട് മുഖ്യമന്ത്രി വിജയിനെ ക്ഷണിക്കാൻ കലാനിധി മാരനൊപ്പം അനിരുദ്ധും നേരിട്ടെത്തിയിരുന്നു.
തമിഴ് സൂപ്പർതാരം രജനീകാന്തിന്റെ ഭാര്യ ലത രജനീകാന്തിന്റെ സഹോദരപുത്രനാണ് അനിരുദ്ധ് രവിചന്ദർ. ദക്ഷിണേന്ത്യൻ സിനിമയിലെ തരംഗമായ സംഗീത സംവിധായകനും ക്രിക്കറ്റ് ലോകത്തെ ശ്രദ്ധേയ സാന്നിധ്യമായ കാവ്യ മാരനും ഒന്നിക്കുന്ന വിവാഹച്ചടങ്ങിൽ രാഷ്ട്രീയ, ചലച്ചിത്ര, കായിക മേഖലകളിലെ പ്രമുഖ താരനിര പങ്കെടുക്കും.
