തിരുവനന്തപുരം വെടിവെപ്പിൽ വെടിയേറ്റ യുവതിയുടെ ഭര്‍ത്താവിനെതിരേ വനിതാ ഡോക്ടറുടെ പീഡനപരാതി
തിരുവനന്തപുരം: വഞ്ചിയൂരിലെ വീട്ടിൽക്കയറി യുവതിക്ക് നേരെ വെടിവെപ്പ് നടത്തിയ കേസിൽ വഴിത്തിരിവ്. അറസ്റ്റിലായ ഡോക്ടറുടെ പരാതിയിൽ വെടിയേറ്റ ഷിനിയുടെ ഭർത്താവ് സജീത്തിനെതിരെ പീഡനക്കുറ്റം ചുമത്തി പൊലീസ് കേസെടുത്തു. സുജീത്ത് തന്നെ ബലംപ്രയോഗിച്ച് ലൈംഗിക പീഡനത്തിനിരയാക്കിയെന്നാണ് പരാതി. തന്നെ പീഡിപ്പിച്ചതിന് പ്രതികാരമായാണ് ആക്രമണമെന്നാണ് കൊല്ലം സ്വദേശിയും പ്രതിയുമായ വനിതാ ഡോക്ടർ മൊഴി നൽകിയിരിക്കുന്നത്.
വര്‍ഷങ്ങളായി സുജീത്തുമായി സൗഹൃദമുണ്ടായിരുന്നുവെന്നും സൗഹൃദം അവസാനിപ്പിച്ചതിലുള്ള വൈരാഗ്യത്തിന്റെ പുറത്താണ് സുജീത്തിന്റെ ഭാര്യയായ ഷിനിയെ ആക്രമിച്ചതെന്നും പ്രതി നേരത്തെ മൊഴി നല്‍കിയിരുന്നു. പിന്നീടാണ് സുജീത്തിനെതിരെ പീഡന പരാതി നല്‍കിയത്.
ഇരുവരും ഒരുമിച്ച് ജോലി ചെയ്തിരുന്ന സമയത്താണ് പീഡനം നടന്നിരുന്നതെന്നാണ് പരാതിയില്‍ പറയുന്നത്. വിവാഹവാഗ്ദാനം നല്‍കിയാണ് പീഡനം നടന്നതെന്നും ശേഷം സുജീത്ത് മാലദ്വീപിലേക്ക് പോയെന്നും വനിതാ ഡോക്ടറുടെ മൊഴിയിലുണ്ട്. പരാതിയുടെ അടിസ്ഥാനത്തില്‍ പോലീസ് സുജീത്തിനെ ചോദ്യം ചെയ്തേക്കും.
സുജീത്ത് കൊല്ലത്തുള്ള സ്വകാര്യ മെഡിക്കല്‍ കോളേജ് ആശുപത്രിയില്‍ പി.ആര്‍.ഒ ആയിരിക്കെയാണ് അവിടെ തന്നെ ജോലിചെയ്തിരുന്ന പ്രതിയുമായി പരിചയപ്പെട്ടതും സൗഹൃദത്തിലായതും.ഈ സമയത്താണ് പീഡനം നടന്നതെന്നാണ് മൊഴി.
എട്ട് മാസത്തിന് ശേഷം സുജീത്ത് മാലദ്വീപിലേക്ക് പോയി. തന്നെ ഒഴിവാക്കാനാണ് സുജിത്ത് ശ്രമിക്കുന്നതെന്ന തോന്നലില്‍ നിന്നാണ് എയര്‍ ഗണ്‍ ഉപയോഗിച്ച് സുജീത്തിന്റെ ഭാര്യയെ ആക്രമിക്കാന്‍ പദ്ധതിയിട്ടതെന്നും പ്രതി മൊഴി നല്‍കിയിരുന്നു. പ്രതിയായ ഡോക്ടറുമായി സൗഹൃദമുണ്ടായിരുന്നതായി സുജീത്തും നേരത്തെ പോലീസിനോട് സമ്മതിച്ചിരുന്നു.
