കോട്ടയത്ത് പാസ്പോർട്ട് സേവാ കേന്ദ്രം ഇന്നു തുറക്കും

കോട്ടയം: കോട്ടയം നിവാസികളുടെ നാളുകളുടെ കാത്തിരിപ്പിനു ശേഷം പാസ്പോർട്ട് സേവാ കേന്ദ്രം ഇന്നു തുറക്കും. വൈകിട്ടു മൂന്ന് മണിക്ക് കേന്ദ്രമന്ത്രി വി.മുരളീധരൻ ഉദ്ഘാടനം ചെയും. തോമസ് ചാഴികാടൻ എംപി അധ്യക്ഷത വഹിക്കും.

ടിബി റോഡിൽ പൊതുമരാമത്ത് റെസ്റ്റ് ഹൗസിന് എതിർവശത്തായി ഒലീവ് ബിൽഡിങിലാണ് പുതിയ പാസ്പോർട്ട് സേവാ കേന്ദ്രം. 2 നിലകളിലായി 14,000 ചതുരശ്രയടി വിസ്തീർണത്തിലുള്ള കെട്ടിടത്തിൽ പാസ്പോർട്ട് എടുക്കാൻ വരുന്നവർക്ക് ഒന്നാം നിലയിൽ എല്ലാ ക്രമീകരണവും ഏർപ്പെടുത്തിയിട്ടുണ്ട്. മുകളിൽ അനുബന്ധ സൗകര്യങ്ങളും ഏർപ്പെടുത്തിയിട്ടുണ്ട്.

വിശാലമായ ഹാൾ, രേഖകൾ പരിശോധിക്കാനായി പ്രത്യേക കൗണ്ടറുകൾ, ഹൈസ്പീഡ് ഇന്റർനെറ്റ്, ഫോട്ടോസ്റ്റാറ്റ് എടുക്കാനുള്ള സൗകര്യം, എടിഎം കൗണ്ടർ മുതലായ സൗകര്യങ്ങൾ ലഭ്യമാണ്. പ്രായമായവർക്കും ഭിന്നശേഷിക്കാർക്കും സൗകര്യപ്രദമായാണ് ഇവിടെ ക്രമീകരണം ചെയ്തിരിക്കുന്നത്. നാഗമ്പടത്തു പ്രവർത്തിച്ചിരുന്ന കെട്ടിടത്തിനു ബലക്ഷയമുണ്ടെന്ന റിപ്പോർട്ടിന്റെ അടിസ്ഥാനത്തിൽ കഴിഞ്ഞ വർഷം ഫെബ്രുവരി 16നാണ് പഴയ കേന്ദ്രം അടച്ചത്.

Kottayam Passport Seva Kendra will be opened today